Unang araw ng paghahain ng COC naging maayos ayon sa Comelec
Maayos at matumal ang unang araw ng paghahain ng Certificate of Candidacy (COC) ngayong araw, October 1.
Ganito inilarawan ni Comelec Chairman George Erwin Garcia ang sitwasyon sa Metro Manila at iba pang mga lugar sa bansa kung saan nagaganap ang paghahain ng COC.
Ayon kay Garcia, dahil unang araw pa lamang ay hindi pa ganoon karami ang naghahain ng kandidatura.
Sinabi rin ni Garcia na sapat ang security measure na ipinatutupad sa Metro Manila at sa iba pang lugar sa bansa.
Sa Manila Hotel kung saan nagaganap ang COC filing para sa national positions, nagtalaga ng sapat na bilang ng mga otoridad para magpanatili ng kapayapaan at kaayusan.
Sinabi ni Garcia na kapwa naman nag-commit ang Philippine National Police (PNP) at ang Armed Forces of the Philippines (AFP) na agad silang magde-deploy ng dagdag na mga puwersa kung kakailanganin. (DDC)
