P759K na halaga ng High-Grade na marijuana nakumpiska sa Pampanga

Nakumpiska ng mga tauhan ng Bureau of Customs (BOC) – Port of Clark ang 460 gramo ng High-Grade Marijuana na tinatayang aabot sa P759,000 ang halaga.

Ginawa ng BOC ang operasyon katuwang ang mga tauhan ng Philippine Drug Enforcement Agency (PDEA), Philippine National Police – Aviation Security Group (PNP-AVSEG), National Bureau of Investigation (NBI) Pampanga District Office, Department of Justice (DOJ), at mga opisyal ng barangay sa Dau, Pampanga.

Ayon sa BOC, ang kargamento ay idineklarang naglalaman ng “Signed and Framed Sports Illustrated Magazine.”

Isinailalim ito sa X-ray Inspection Project (XIP) at physical examination matapos ma-detect ang kahina-hinalang laman nito.

Nang buksan ang kargamento natuklasan ang isang transparent self-sealing pouch na may lamang dried leaves.

Agad nagpalabas ng Warrant of Seizure and Detention sa shipment dahil sa paglabag sa Customs Modernization and Tariff Act (CMTA), in relation to R.A. No. 9165. (DDC)