2 Vietnamese national kalaboso sa droga at baril sa Pasay City

Dalawang Vietnamese nationals ang dinakip ng Pasay City Police matapos umanong makumpiskahan ng ilegal na droga at baril sa isang bar sa Roxas Boulevard, Barangay 76, Zone 10.

Kinilala ang inarestong mga suspek na sina alyas Van, 26-anyos,dahil sa paglabag sa RA 10591at Light Threat at alyas Hoang, 23-anyos, naman sa paglabag sa RA 9165 at Light Threat.

Nagsasagawa ng monitoring sa mga KTV bars sa lungsod ang mga tauhan ng Station Intelligence Section at anim na iba pa kaugnay sa report na may dalang baril ang mga protective agents sa loob ng bars at clubs nang lapitan sila ng complainant na si alyas Truong, 26-anyos, Vietnamese national, nang pagbantaan umano siya ng mga suspek at pakitaan ng baril.

Agad umaksyon ang mga pulis na nagresulta ng pagkakaaresto ng dalawang suspek at marekober ang isang Colt Combat Commander caliber. 45 pistol na may serial number, magazine na may tatlong bala mula sa suspek na si alyas Van at isang pakete na naglalaman ng 1.5 gramo ng hinihinalang shabu sa suspek na si Hoang.

Inihahanda na ng otoridad ang pagsasampa ng kaso laban sa dalawang dayuhang suspek. (Bhelle Gamboa)