Lookout bulletin order inilabas ng DOJ laban kay Alice Guo at 17 iba pa

Nagpalabas na ng immigration lookout bulletin order (ILBO) ang Department of Justice (DOJ) laban kay Bamban, Tarlac Mayor Alice Guo.

Ayon kay Bureau of Immigration (BI) Commissioner Norman Tansingco, natanggap nila ang kopya ng tatlong-pahinang ILBO mula sa DOJ laban kay Guo at 17 iba pa.

Sa ilalim ng ILBO, inaatasan ng DOJ ang mga immigration officer na i-double check muna kung mayroong warrant of arrest ang nasa listahan o anumang paglabag kapag ito ay aalis ng bansa.

Kailangan ding i-monitor ang kanilang itineraries o kanilang pupuntahan kapag sila ay magtatangkang umalis ng bansa.

Sa inilabas na ILBO laban kay Guo, nakasaad na maaari ding maghain ng precautionary Hold Departure Order laban dito.

Nai-encode na sa sistema ng BI ang ILBO laban kay Guo para agad ma-detect ang anumang pagtatangkang pag-alis nito sa bansa. (DDC)