Warehouse sa Parañaque City nasusunog

Patuloy na inaapula ng mga bumbero ang nasusunog na warehouse o bodega na naglalaman ng sapatos at iba pang gamit sa Parañaque City ngayong June 11.

Sa inisyal na ulat ng Parañaque City Bureau of Fire Protection, dakong alas-11:27 ng umaga sumiklab ang apoy sa ikalawang palapag ng bodega na pagmamay-ari ng isang Winnie Ong, sa Gen Hayme Street, Airport Village, Barangay Vitalez sa nasabing lungsod.

Bigla na lamang umanong nagkaroon ng usok hanggang sa kumalat ang apoy sa loob ng warehouse.

Mabilis namang rumesponde ang mga fire trucks sa lugar.

Inilagay na ng BFP sa ikatlong alarma ang sunog bandang 11:47 ng umaga.

Wala namang naiulat na nasugatan sa mga empleyado sa bodega.

Inaalam pa ng otoridad ang sanhi ng sunog at ang lawak ng pinsalang idinulot nito sa warehouse. (Bhelle Gamboa)