Las Piñas nagdiwang ng taunang Fiesta ng Bayan

Nagsagawa ang Las Piñas City ng kanyang taunang kapistahan ng bayan bilang pag-aalay sa Santong Patron ng Lungsod na si Tata Hosep nitong May 5.

Dumalo sa kapistahan ang mga opisyal ng Pamahalaang Lokal kabilang sina Mayor Imelda T. Aguilar, Vice Mayor April Aguilar at mga konsehal ng lungsod.

Ang matagumpay na selebrasyon ay sinimulan ng taunang kapistahang misa sa Diocesan Shrine at Parish of St. Joseph na mas kilala bilang Bamboo Organ Church. Si Bishop Jesse E. Mercado ng Diocese of Parañaque ang siyang nangasiwa sa naturang serbisyo kasama ang mga dumalong opisyal ng lungsod, na sumasalamin sa malalim na ugnayang espirituwal at mabubuting kaugalian.

Sinundan ang misa ng pagdiriwang sa pagmamartsa ng sariling mga banda mula sa Las Piñas at iba pang panauhing banda na nagtampok ng kanilang husay at makasining na mga talento na nagbigay naman ng saya at tuwa sa mga dumalo.

Nagkaroon din ng competitive band at dance contests kung saan ang mga sumali ay nagpamalas ng kanilang pagiging malikhain na nagbibigay-diin sa pakikilahok ng komunidad sa pagpreserba ng kultura at selebrasyon.

Bago matapos ang kaganapan, lalong nagpasaya sa mga tao ang makukulay na fireworks display.

Ang pagdiriwang ng kapistahan ni Tata Hosep ay patuloy na tradisyon upang pangalagaan ang ugnayang pangkomunidad at ipinagmamalaking kultura ng Las Piñas City. (Bhelle Gamboa)