Katatagan ng mga simbahan na sakop ng Diocese of Malolos pinasusuri

Inatasan na ng Diocese ng Malolos ang lahat ng parish priests sa mga sakop nitong simbahan na tignan ang kani-kanilang istraktura.

Kasunod ito ng pagguho ng bahagi ng ikalawang palapag ng St. Peter the Apostle Parish sa San Jose Del Monte City na ikinasawi ng 1 at ikinasugat ng higit 50 katao.

Nangyari ang insidente sa kasagsagan ng misa para sa Ash Wednesday.

Sa pahayag sinabi ni Malolos Bishop Dennis Villarojo na dapat tignan ang integridad ng mga simbahan na nasasakupan ng diocese lalo at inaasahan ang dagsa ng mga mananampalataya para sa mga aktibidad ngayong panahon ng Kuwaresma.

Nag-alay din ng dasal at pakikiramay si Villarojo para sa isang nasawi at para sa mabilis na paggaling ng mga nasugatan.

Sa ngayon sinabi ni Villarojo na inaasistihan ni Fr. Romulo Perez, at ng diocese ang mga naapektuhang indibidwal. (DDC)