17 Vietnamese crew ng isang barko nailigtas ng PCG sa Palawan

Nailigtas ng mga tauhan ng Philippine Coast Guard (PCG) at ng Philippine National Police Maritime Group (PNP MARIG) ang 17 Vietnamese crew ng Vietnamese-flagged general cargo vessel na VIET HAI STAR.

Ito ay matapos na lumubog ang nasabing barko sa katubigan na sakop ng Balabac, Palawan.

Ayon sa PCG, lulan ng VIET HAI STAR ang 4,000 tons ng bigas ng ito ay sumadsad malapit sa Balabac Port.

Galing ng Ho Chi Minh City, Vietnam ang barko at ptungo ng Cagayan de Oro City ng makitaan ng leakage ang starboard side nito.

Agad nagpadala ng joint search and rescue (SAR) team ang PCG at PNP para mailigtas ang mga dayuhang crew ng barko.

Nang dumating sa lugar ang mga otoridad, pinasok na ng tubig ang unang compartment ng bow ng barko.

Madaling araw ng Miyerkules (Nov. 22) nang ideklara ang “abandon ship” dahil papalubog na ang barko.

Pawang nasa maayos na kondisyon naman ang 17 Vietnamese crew nang sila ay dumating sa Balabac Port. (DDC)