4 na Coast Guard rescuers pinaghahanap sa Aparri, Cagayan

Nagsasagawa ng search and rescue (SAR) operation ang Philippine Coast Guard (PCG) matapos tumaob ang isang PCG aluminum boat sakay ang apat na PCG rescuers sa katubigang sakop ng Aparri, Cagayan.

Sakay ng aluminum boat ang apat na rescuers upang sagipin sang pitong tripulanteng sakay ng M/Tug Iroquis.

Habang binabaybay ang Cagayan River, tumaob ang aluminum boat dahil sa malakas na hangin at malalaking alon sa kasagsagan ng Bagyong Egay.

Nagsagawa ng SAR operation Huwebes (July 27) ng umaga ngunit pansamantala itong itinigil dahil sa sama ng panahon.

Nakatakda na ring magpadala ng Coast Guard Aviation Force (CGAF) helicopter sa naturang katubigan para makatulong sa paghahanap sa apat na PCG rescuers. (DDC)