Labi ng 3 crew ng lumubog na bangka sa Davao Oriental naiuwi na sa GenSan
Naiuwi na sa Barangay Calumpang, General Santos City ang mga labi ng tatlong crew ng FB GENESIS 2 na lumubog sa karagatang sakop ng Baganga, Davao Oriental noong June 22, 2023.
Ayon sa Philippine Coast Guard, kasama ring umuwi sa GenSan ang 14 na nakaligtas na crew ng bangka.
Lulan sila ng FB RYAN ROMUALD 88 nang dumating sa GenSan.
Nakipag-ugnayan na ang Ogdi Fishing Company sa pamilya at mga mahal sa buhay ng tatlong nasawing crew.
Dinala ang kanilang mga labi sa pinakamalapit na punerarya.
Ayon sa PCG District Southeastern Mindanao, dakong 3:30 ng madaling araw ng Lunes, June 26 ay ipinagpatuloy ang search and rescue (SAR) operations para sa anim pang crew ng FB GENESIS 2 na nawawala. (DDC)
