Hinahatak na trailer truck dumausdos sa Buendia Flyover; driver at pahinante kinailangang i-rescue
Maagang naperwisyo ang mga motorista sa bahagi ng Buendia sa Pasay City.
Ito ay makaraang dumausdos pababa ng Buendia Flyover ang nasiraang trailer truck habang hinahatak ito ng tow truck.
Ang nasiraan ay isang 22-wheeler trailer truck na may lulang anim na coil sheet at hinila ito ng dalawang maliit na tow truck.
Pero dahil sa bigat ng trailer truck at ng karga nito ay hindi ito kinaya ng dalawang maliit na tow truck at dumaudos sa flyover.
Wasak ang apat na plant box at isang poste ng ilaw ang tumumba dahil sa nasabing aksidente.
Inabot ng madaling araw ng Martes (May 16) ang pag-rescue sa driver ng trailer truck na naipit sa sasakyan.
Dahil din sa nasabing aksidente ay ilang oras na isinara sa daloy ng traffic ang Buendia flyover.
Pasado alas 6:00 na kasi ng umaga ay sarado pa rin ang nasabing kalsada at hindi pa naiaalis sa lugar ang mga naaksidenteng sasakyan. (DDC)
