Motorcycle rider patay, 6 sugatan sa aksidente sa Las Piñas

PATAY ang isang motorcycle rider habang anim na katao naman ang nasugatan matapos araruhin ng isang Sports Utility Vehicle (SUV) ang ilang sasakyan sa Alabang-Zapote Road, Barangay Pamplona 3 sa Las Piñas City nitong Miyerkules ng umaga.

Binawian ng buhay Perpetual Help Medical Center ang biktima na si Andrew Ferry Cervantes, residente ng B4 L21 Monaco Dr. Franceville Homes, Bulihan, Silang, Cavite, nagmamaneho ng Yamaha Sight na may plakang 499DAX.

Nasugatan naman sa aksidente sina Ramil Estilloso, ng No. 954 Tramo Dt, Ilaya, Zapote, Las Pinas na driver ng Honda PCX; Marie Ida, ng Gloria Diaz St, BFRV, Talon 2, Las Pinas, driver ng Yamaha Mio ND55208); John Paolo Pineda, ng Concerto St, Sta. Cecilla Village, Talon 2, Las Pinas, driver ng Yamaha nouvo 5105ND); David Setias Jr. ng Durian St, Manuela Subd. IV, driver ng Foton van na may plakang NAZ5266; Vicente Matriano, ng Rosegold St, Manuela Subd. Barangay Pamplona 3, Las Pinas, driver ng Subaru NBM4493; at ang pedestrian na si Milagros Molato, ng Arevalo St. Martinville Subd., Pulang Lupa 2, Las Pinas City.

Dakong alas-9:30 ng umaga ng May 10 naganap ang aksidente sa harap ng Divine Light Academy School sa Alabang-Zapote Road nang biglang araruhin ng SUV ang ilang sasakyan kasama na ang isang van,tatlong motorsiklo at minalas pang sagasaan ang tumatawid na si Molato.

Agad dinala sa naturang pagamutan ang mga biktima subalit binawian ng buhay si Cervantes dahil sa tinamong matinding pinsala sa katawan bandang alas-10:25 ng umaga.

Nasa kustodiya ng Las Piñas City Police ang driver ng SUV at mahaharap sa kaukulang kaso sa piskalya ng lungsod. (Bhelle Gamboa)