42 pang Pinoy galing Sudan, dumating sa bansa

Dalawang batch pa ng mga Pinoy galing ng bansang Sudan ang ligtas na nakabalik sa Pilipinas.

Dumating ang ikalimang batch na kinabibilangan ng 25 Pinoy sa NAIA Terminal 1 galing ng Riyadh.

Karamihan sa mga dumating ay mga estudyante na naapektuhan ng kaguluhan sa Sudan.

Ang ika-anim na batch ay binubo naman ng 17 Pinoy.

Galing Port of Sudan ay inilikas sila patungong Jeddah at dumating sa NAIA Terminal 1.

Ang mga umuwing Pinoy ay sinalubong nina Department of Migrant Workers (DMW) Asec. Venecio Legaspi, OWWA Deputy Administrator Mary Melanie Quino, kasama ang mga kawani ng DFA, DMW at OWWA Airport Team.

Bukod sa emergency kit, ang mga umuwing Pinoy ay binigyan ng food & transportation assistance, hotel accommodation, kung kinakailangan at financial assistance mula DMW-OWWA.

Ayon kay OWWA Admin. Arnell Ignacio ngayong araw ay mayroon pang 76 na Pinoy na nakatakdang dumating sa bansa.

Pauwi na din ng bansa si Ignacio matapos na personal na pangasiwaan ang paglilikas sa mga Pinoy na naapektuhan ng gulo sa Sudan. (DDC)