3 Pinoy nasawi, 5 sugatan sa sunog sa isang factory sa Taiwan
Kinumpirma ng Manila Economic and Cultural Office (MECO) na mayroong tatlong Pinoy na nasawi at lima pa ang nasugatan sa sunog na naganap sa isang factory sa Taiwan.
Sa pahayag sinabi ni MECO chair Silvestre Bello III na naimpormahan na ang pamilya ng tatlong nasawing Pinoy.
Sumiklab ang sunog sa ikalawang palapag ng Lian-Hwa Foods Corporation sa Changhua County sa central Taiwan noong Martes ng umaga.
Nagpaabot naman ng pakikiramay si Bello sa kaanak ng mga nasawi.
Samantala, limang Pinoy din ang naospital matapos masunugan dahil sa insidente.
Pawang nasa maayos naman nang kondisyon ang apat sa kanila maliban sa isa na nananatili pa sa intensive care unit. (DDC)
