Chinese national at Pinoy driver, kalaboso sa ‘pagbebenta ng registered SIM cards na may GCash accounts’ sa Makati

Isang Chinese national at kanyang Pilipinong driver ang inaresto ng mga operatiba ng Southern Police District-Special Operations Unit sa isinagawang buy-bust operation sa Makati City.

Dinakip ang mga suspek na sina Jinxing Zhao, 29-anyos, isang Chinese national, at Cristobal Cacayurin Jr., 56-anyos, driver, dahil sa umano’y mga paglabag sa Republic Act 11934 o Subscriber Identity Module (SIM) Registration Act at ng Republic Act 10175 o Cybercrime Prevention Act of 2012.

Unang nakatanggap ang otoridad ng impormasyon mula sa isang confidential informant na ang mga suspek ay sinasabing nagbebenta ng registered prepaid SIM cards na may GCash accounts.

Dahil dito ikinasa ang buy-bust operation sa harapan ng isang tower sa Barangay Población, Makati City na nagresulta ng pagkakaaresto ng mga suspek.

Nakumpiska ng operatiba ang 50 pirasong Globe Prepaid simcard, marked money at isang itim na 2017 Ford Fiesta Hatchback na may plakang DAE 2411. (Bhelle Gamboa)