2 suspek tiklo sa P136K ‘shabu’ sa Pasay

Dalawang lalaking suspek ang inaresto ng otoridad matapos marekober ang 20 gramo ng umano’y shabu na nagkakahalaga ng ₱136,000 sa isinagawang buy-bust operation sa Pasay City.

Inihayag ni Southern Police District (SPD) District Director, Brigadier General Kirby John Kraft ang pagkakaaresto ng suspek na si John Jason Placido,alyas Iton, 27-anyos at kasabwat nitong si Elton John Bella,alyas Atong, 27-anyos, kapwa nakalista sa drug watchlist bilang mga Street Level Individuals.

Nagkasa ng buy-bust operation ang mga tauhan ng Station Drug Enforcement Unit ng Pasay City Police Station sa 54 First Street, Pildera 2, Brgy. 194, Zone 20 sa lungsod dakong alas-8:30 ng gabi nitong Marsk 23 na ikinaaresto nina Placido at Bella.

Nakumpiska ng otoridad ang tatlong pakete na naglalaman ng umano’y ilegal na droga, marked money at isang Yamaha Mio motorcycle na may plakang MC6973TM.

Nasa kustodiya ng Pasay CPS ang dalawang suspek habang inihahanda ang kasong paglabag sa Comprehensive Dangerous Drugs Act of 2002. (Bhelle Gamboa)