Paghahanap sa helicopter na may sakay na pasyente sa Palawan nagpapatuloy
Patuloy ang ginagawang search and rescue operation ng Philippine Coast Guard (PCG) para mahanap ang nawawalang helicopter na “YELLOW BEE.”
Nilibot ng PCG-SAR team ang katubigang sakop ng mga isla ng Candaraman, Canibungan, Matangule, Sebaring, at Bugsuk sa Palawan.
Kinausap din ng PCG ang mga lokal na mangingisda para malaman kung may napansin silang palutang-lutang na gamit o kahina-hinalang insidente na maaaring may kaugnayan sa hinahanap na helicopter.
Noong March 1, 2023, nakipag-ugnayan ang Philippine Aeronautical Rescue Coordinating Center (PARCC) sa PCG matapos mawalan ng contact sa YELLOW BEE na may sakay na pasyente mula Mangsee Island papuntang Brooke’s Point. (DDC)
