Tumagilid na motor tug sa San Juan, Batangas nagdulot ng oil spill

Rumesponde ang mga tauhan ng Philippine Coast Guard (PCG) sa nagkaproblemang motor tug sa bahagi ng Subukin Port sa San Juan, Batangas.

Ayon sa PCG, dahil sa malakas na alon pinasok ng tubig ang M/TUG STRONG BRAVERY habang nakadaong sa pantalan.

Mabilis namang nakalikas ang lahat ng crew ng motor tug.

Dahil sa insidente, nakapagtala ng oil spill ang PCG at umabot sa 300 square meters wide ang naapektuhan.

Nakapagtala din ang mga tauhan ng PCG Marine Environmental Protection Group-Batangas ng 30 hanggang 40 litro ng oil patches sa baybaying ndagat.

Nagsagawa na ang PCG ng manual oil spill recovery gamit ang sorbent pads at mga drum para malinis ang tumagas na langis. (DDC)