Empleyado ng munisipyo sa isang bayan sa Quezon na “single since birth”, tatanggap ng triple pay sa Valentine’s Day

May regalo ang pamahalaang bayan ng General Luna, Quezon sa mga empleyado ng munisipyo na na “single since birth” at sa mga empleyadong limang taon nang walang kasintahan at malamig ang valentines.

Ayon kay Mayor Matt Florido, ang mga empleyadong “single since birth” na papasok sa trabaho sa Feb. 14 araw ng mga puso ay tatanggap ng triple pay.

Habang ang mga empleyadong 5 years nang walang love life at papasok sa trabaho sa Feb. 14 ay tatanggap ng double pay o kaya naman ay puwede silang mag-avail ng leave with pay sa Feb. 13 o bisperas ng valentines para makapag-enjoy sila ng long weekend.

Sa mga kwalipikadong empleyado, maaaring isumite sa Mayor’s Office o sa HRMO ang aplikasyon para sa nasabing benepisyo.

Mayroong special committee na binuo para mag-validate kung talagang kwalipikado ang mga empleyado.

Ayon sa alkalde, ang benepisyo ay kukuhanin sa kaniyang personal na salapi at hindi kukunin sa pondo ng lokal na pamahalaan. (DDC)