Staff na nagpa-survey sa FB ng love life ni OWWA chief Arnell Ignacio, pinagsabihan

Nasermunan na ang staff ng Overseas Workers Welfare Administration (OWWA) na nasa likod ng pa-survey tungkol sa love life ni OWWA chief Arnell Ignacio.

Noong Jan. 21, ibinahagi sa official Facebook page ng OWWA ang post na nagtatanong sa mga OFW kung sila ba ay “payag na muling magmahal ang puso ni Ignacio”.

Hinikayat sa nasabing post ang mga netizen ng mag-comment ng “YES” kung sila ay payag at “NO” naman kung hindi.

Sa press briefing, sinabi ni Ignacio na napagsabihan na ang nasa likod ng naturang post.

Bagaman mabuti aniya ang intensyon nito ay hindi dapat sa official page inilagay ang post.

Noong Feb. 1 naglabas ng disclaimer ang OWWA at sinabing mali ang naibahaging post patungkol sa personal concern ng OWWA chief.

Dahil sa insidente, sinabi ni Ignacio na sasailalim sa reorganization ang grupong nangangasiwa sa FB page ng OWWA. (DDC)