Labi ng 8 PDLs na hindi na-claim ng kaanak naihatid na sa huling hantungan
Inihatid na ng Bureau of Corrections (BuCor) sa huling hantungan ang walong nasawing Persons Deprived of Liberty (PDLs) na walang nag-claim na kaanak.
Ang proseso ng paglilibing sa nasabing mga PDL ay isinagawa ng General Services Division (GSD) ng BuCor sa pamamagitan ng Civil Engineering Section at New Bilibid Prison (NBP) Cemetery and Management Section.
Inilibing ang mga PDL sa NBP Cemetery sa loob ng New Bilibid Prison Reservation sa Muntinlupa City.
Bago ang paglilibing ay nagsagawa muna ng pagbabasbas si Rev. Fr. Jason Bill C. Valeza, ang Parish Priest ng Ina ng Awa Parish.
Sa ilalim ng patnubay ni BuCor Acting Director General, General Gregorio Pio Catapang Jr. ay tunay ang kanyang pagpapatupad ng programang pangreporma upang magbigay ng mapagkalingang serbisyo sa mga PDL. (Bhelle Gamboa)
