Biyahe ng mga sasakyang pandagat sa Isabela City at Zamboanga City sinuspinde ng Coast Guard

Sinuspinde ng Philippine Coast Guard ang paglalayag ng lahat ng uri ng sasakyang pandagat sa Isabela City patungong Zamboanga City at vice versa.

Bunsod ito ng nararanasang hindi magandang panahon na epeko ng Low Pressure Area (LPA) sa Zamboanga Peninsula, Basilan Strait at Sulu Sea.

Sa inilabas na Sea Travel Advisory ng Coast Guard Station Isabela, epektibo ang suspensyon ngayong araw ng Martes (Jan. 11).

Ito ay para matiyak na maiiwasan ang maritime accidents na maaaring maidulot ng sama ng panahon at malalaking alon.

Magpapalabas na lamang muli ng abiso ang Coast Guard kung kailan papayagan ang pagbiyahe ng mga sasakyang pandagat sa sandaling bumuti na ang lagay ng panahon. (DDC)