Rider patay ng mabundol ng truck sa Pasay

Patay ang isang rider makaraang mabangga ng truck ang kanyang motorsiklo sa Pasay City nitong Disyembre 16.

Dead on arrival sa Pasay City General Hospital ang biktima na si Benedict Perona Ocampo, 36, negosyante, at residente sa 2244 Tramo Street sa lungsod.

Mahaharap sa kasong reckless imprudence resulting to homicide ang driver ng Fuso Wing Van Truck (CBR–5219) na si Zosimo Magsayo Andalay,35, ng Maligaya, Brgy. Pasong Putik, Quezon City.

Base sa report ni SSg Rootch B Miranda, imbestigador ng Pasay Vehicular Traffic Investigation Section, naganap ang insidente sa EDSA eastbound lane harapan ng Winston Hotel, Pasay City dakong alas-4:20 ng madaling araw.

Minamaneho ng biktima ang TMAX motorcycle na may plakang 834-UIN sa lugar nang banggain ng truck na minamaneho ng suspek.

Sa lakas ng pagkakabangga ay tumilapon sa motorsiklo ang biktima at bumagsak sa sementong kalsada.

Agad na dinala sa pagamutan ang biktima subalit binawian ng buhay. (Bhelle Gamboa)