In-person visitation sa Cebu City Jail Male Dormitory papayagan na muli simula sa Dec. 17
Simula sa Dec. 17, 2022 ay papayagan na muli ang in-person visitation sa Cebu City Jail Male Dormitory.
Sinuspinde ang in-person visitation kasunod ng mga problemang naranasan sa isinagawang a 4-day dry run noong November 29 hanggang November 30 at December 1 hanggang December 3.
Ayon kay Jail Officer (JO3) Blanche Bation base sa ginawang assessment, lumitaw na ang registration process ay umuubos ng oras dahil manual itong ginagawa.
Dahil dito, inumpisahan na noong Lunes, December 12 ang pre-registration para sa mga bibisita sa bilangguan.
Magkakaroon din ng biometrics activation para mas magiging madali ang pag-beripika sa mga bisita.
Sa pre-registration, ang mga bisita ay kailangang magpakita ng valid identification cards at sumailalim sa quick interview.
Sa Sabado, December 17, ang mga nakapagparehistro at mayroon nang schedule ay papayagang pumasok sa pasilidad mula 1:00 ng hapon hanggang 5:00 ng hapon. (DDC)
