11 mangingisda nailigtas matapos bumaligtad ang sinasakyang bangka sa Zamboanga City

Rumesponde ang mga tauhan ng Philippine Coast Guard (PCG) sa isang maritime incident sangkot ang isang bangkang pangisda sa karagatang sakop ng Tigtabon Island at Mampang, Zamboanga City.

Nakatanggap ng tawag ang PCG, 10:05 ng gabi mula sa isang residente ng Mampang hinggil sa insidenteng kinasangkutan ng F/B JAYA-1 sakay ang 11 mangingisda.

Unang nailigtas ng mga tauhan ng Philippine National Police (PNP) Maritime Group ang 2 sa 11 mangingisda.

Kalaunan ay nailigtas naman ng mga tauhan ng PCG Station Zamboanga ang apat pang mangingisda.

Nag-deploy ng Coast Guard floating assets sakay ang search and rescue (SAR) para tumulong sa paghahanap.

At doon natagpuan ang 5 pang mangingisda.

Pawang nasa maayos na kondisyon ang 11 mangingisda. (DDC)