San Juan City Mayor Francis Zamora bagong presidente ng Metro Manila Council
Nahalal si San Juan City Mayor Francis Zamora bilang presidente ng Metro Manila Council (MMC) at co-chairperson ng Regional Development Council.
Sa inilabas na pahayag ng San Juan City government, nahalal si Zamora sa idinaos na joint session ng dalawang council.
Sinabi ni Zamora na sa kasagsagan ng pandemya, nakita niya kung gaano kahalaga na ang labingpitong mayor sa Metro Manila ay nagkakaisa.
Tiniyak ni Zamora na magpapatuloy ang pagkakaisa ng mga alkalde sa NCR.
Bagaman may mga pagkakataon aniya na magkakaroon ng hindi pagkakasundo, ang tinig ng bawat mayor ay tiyak aniyang maririnig at mabibigyan ng pansin upang magkaroon ng buong desisyon ang MMC.
Nagpahayag din ng pasasalamat si Zamora sa iba pang MMC officials at kay Metro Manila Development Authority (MMDA) Chairman Romando Artes.
Ani Zamora kabilang sa mga pangunahing kailangang tugunan sa Metro Manila ay ang problema sa traffic at peace and order. (DDC)
