S.A.F.E. App Alert inilunsad ng NCRPO

Inilunsad ng National Capital Region Police Office (NCRPO) ang S.A.F.E. NCRPO App Alert para sa mas mabilis na pagresponde at pagtugon ng mga pulis sa mga sumbong ng mamamayan gamit ang mobile phone kaugnay sa mga nangyayaring krimen sa kanilang lugar.

Bahagi ito ng programang itinaguyod ni NCRPO Acting Regional Director, Brigadier General Jonnel C. Estomo upang mas paigtingin ang kanilang hakbang na pigilin ang mga ilegal na aktibidad o masamang gawain ng mga kriminal.

Pinangunahan ni Estomo ang pamamahagi ng cellular phone na nakalagay ang S.A.F.E. NCRPO App Alert.

Paliwanag ng NCRPO chief na sa pamamagitan ng naturang police app alert ay direktang matatanggap ng Command Center ang mga sumbong o report sa mga komunidad at agad na ibibigay ang impormasyon sa pinakamalapit na pulisya para sa mabilis na aksyon at pagresponde.

Tiwala ang opisyal na mabisang paraan ito upang agarang makatugon ang mga otoridad sa mga humihingi ng tulong at mabilis na maaresto ang mga sangkot o suspek sa krimen sa kanilang lugar. (Bhelle Gamboa)