Halos 2,000 kawani ng gobyerno nakinabang sa libreng sakay sa MRT-3 sa paggunita ng Philippine Civil Service anniversary

Umabot sa 1,944 kawani ng gobyerno ang nakinabang sa handog na Libreng Sakay ng Metro Rail Transit-3 (MRT-3) kahapon, ika-19 ng Setyembre, bilang pakikiisa sa pagdiriwang ng ika-122 anibersaryo ng Philippine Civil Service.

Ayon sa datos ng MRT-3, 661 na kawani ng gobyerno ang nabigyan ng Libreng Sakay mula alas-7:00 hanggang alas-9:00 ng umaga.

Habang pagsapit ng alas-5:00 hanggang alas-7:00 ng gabi, umabot sa 1,283 kawani ng gobyerno ang dumagsa at nakinabang sa handog ng MRT-3.

Kasabay ng pagdiriwang ng anibersaryo ng Philippine Civil Service, binati rin ni MRT-3 General Manager (GM) Engr. Federico Canar, Jr. ang mga kawani ng gobyerno sa kanilang kadakilaan bilang taga-bigay ng serbisyo para sa bayan.

“Nawa ay napadama namin ang pagpapahalaga sa inyo ng Libreng Sakay ng MRT-3, at asahan ninyong patuloy pang paiigtingin ng linya ang pagbibigay ng ligtas at komportableng serbisyo para sa lahat ng pasahero,” ayon kay Canar. (DDC)