Pasay LGU mamamahagi ng tulong pinansyal sa mga mag-aaral

Inanunsyo ni Pasay City Mayor Emi Calixto-Rubiano ang iskedyul sa paglalabas ng tulong pinansiyal sa mga mag-aaral sa dalawang eskuwelahan sa lungsod simula Setyembre 7-10, 2022.

Ayon kay Mayor Rubiano, unang mabibigyan ng financial assistance (FA) sa Setyembre 7-8 mula alas-9:00 ng umaga hanggang 4:00 ng hapon ang mga mag-aaral ng Padre Burgos Elementary School with SPED.

Habang sa Setyembre 9-10 sa parehong oras na nabanggit naman ipamamahagi ang FA sa mga mag-aaral ng Gotamco Elementary School.

Nabatid na ang distribusyon ng FA ay isasagawa mismo sa dalawang nabanggit na eskuwelahan.

Batay sa Public Information Office ng lungsod, ang FA para sa learners ay P1,000 kada buwan sa mga pampublikong paaralan, P4,000 sa high schools kada taon at P4,000 naman kada semester sa kolehiyo. (Bhelle Gamboa)