Libreng “Konsulta Medikal” sa bawat barangay sa Montalban, inilunsad

Ibinaba sa bawat barangay ang pagbibigay ng libreng konsultasyon sa mga may karamdaman sa Montalban, Rizal.

Bahagi ito ng programa ni Dra. Carmela Javier na kabilang sa mga nahalal na bagong konsehal ng bayan.

Ayon kay Javier, ang kaniyang “People’s Day” ay dadalhin sa bawat barangay kung saan magbibigay ito ng libreng konsultasyon sa mga may karamdaman.

Hindi na aniya kailangang magtungo sa munisipyo ng mga residenteng nangangailangan at sa halip, ay dadalhin na lang sa bawat barangay ang pagbibigay ng free consultation.

Bago nahalal bilang konsehal ng bayan, si Javier ay matagal na nanilbihan bilang pinuno ng Municipal Health Office sa Montalban.

Sa ilalim ng kaniyang pamumuno sa MHO ay naging maayos ang sistema sa Rural Health Office ng bayan.

Maraming residente ang nakinabang sa libreng konsultasyon sa mga doktor at nagkaroon din ng libreng pagpapa-laboratoryo. (DDC)