Dating BuCor OIC Rafael Ragos binawi na rin ang kaniyang mga testimonya vs De Lima

Isa pang star witness sa kaso ni Senator Leila De Lima ang binawi ang kaniyang mga testimonya laban sa senador.

Nagsumite ng affidavit si dating Bureau of Corrections (BuCor) officer-in-charge Rafael Ragos, kung saan binabawi nito ang kaniyang mga naging testimonya sa pagharap niya sa senate hearing noong 2016.

Sa nasabing pagdinig sa senado, sinabi ni Ragos na personal siyang naghatid ng P5 million sa bahay ni De Lima sa Parañaque City noong 2012.

Sinabi din niya na may mga kickback mula kay Peter Co at iba pang drug lord na ginamit para sa senatorial bid ni De Lima noong 2013.

Ayon kay Ragos, lahat ng kaniyang mga alegasyon at testimonya sa korte ay gawa-gawa lamang.

Pinilit umano siyang gawin ang nasabing mga testimonya laban sa senadora at tinakot na ipakukulong siya.

Binanggit ni Ragos si dating Sec. Vitaliano Aguirre II na nanakot sa kaniya at pinilit siyang paaminin at pagsalitain sa mga bagay na hindi naman totoong nangyari. (DDC)