Gerald Anderson nabiktima ng basag-kotse gang

Nabiktima ng basag-kotse gang ang aktor na si Gerald Anderson sa Quezon City.

Nakaparada ang SUV ng aktor sa harapan ng isang gym sa QC nang dumating ang mga suspek lulan ng motorsiklo.

Kita sa kuha ng CCTV na isa sa mga suspek ang bumasag sa salamin ng kotse ng aktor at saka kinuha ang dalawang bag.

Agad namang nagsagawa ng imbestigasyon at follow up operations ang National Bureau of Investigation – Special Action Unit dahilan para matunton ang isa sa mga suspek.

Ayon sa NBI SAU Executive Officer Attorney Kristine dela Cruz, natukoy nila na ang motor na ginamit ay ginagamit ng Tondo-based basag kose group.

Sumuko sa NBI ang suspek na si John Allen Dancel at inaming siya ang bumasag sa SUV at kumuha sa mga gamit.

Nakuha sa kaniya ang isang mamahaling bag, dalawang relo at mga gadgets.

Gayunman, hindi pa naibabalik ang wallet, mga ID at passport ng aktor.

Nagpasalamat naman si Anderson sa mabilis na aksyon ng NBI-SAU. (DDC)