Fuel discount sa mga magsasaka at mangingisda ipatutupad na ng DA
Nakatakda nang ipatupad ng Department of Agriculture (DA) ang fuel discount para sa mga magsasaka at mangingisda.
Ang “Fuel Discount for Farmers and Fisherfolk Program,” ay nakasaad sa Special Provision No. 20 ng General Appropriations Act (GAA) for Fiscal Year 2022.
Naglaan ng P500 million na pondo para sa fuel subsidy program ng DA na pakikinabangan ng mga magsasaka at mangingisda ayon kay Agriculture Secretary William Dar.
Sinabi ni Dar na malaking tulong sa mga magsasaka ang fuel discount para mapababa ang kanilang production at transport costs.
Ayon kay Dar, ang DA Regional Field Units at BFAR Regional Offices ang aatasang mamahagi ng fuel vouchers sa mga qualified beneficiary na magagamit nila para sa fuel discount. (DDC)
