Tulong dumagsa para kay Lolo Narding Floro na inakusahan ng pagnanakaw ng sampung kilong mangga

Nilinaw ng Asingan Police Station sa Pangasinan na hindi ikinulong ang 80-anyos na lolo na inakusahan ng pagnanakaw ng sampung kilong mangga.

Ayon sa Asingan police, ipinatupad lamang nila ang utos ng korte matapos mag-isyu ng warrant of arrest laban kay Lolo Narding Floro.

Pero pagdating sa istasyon ng pulisya ay hindi umano inilagay sa selda ang matanda.

Nasa loob lamang ng istasyon ng pulisya si lolo at hindi ikinulong bilang konsiderasyon sa kaniyang edad.

Lagi ding binabantayan ang kaniyang kalusugan, nakakakain ng maayos at binigyan ng maayos na matutulugan sa police station.

Matapos mag-viral ang naging sitwasyon ni Lolo Narding, dumagsa na ang tulong para sa kaniya.

Madami ang nagbigay ng P6,000 para pang-piyansa kay lolo at mayroon na ring abogado ng PAO na tumutulong sa knaiyang kaso.

Ang ibang pera na ibinigay para sa piyansa ni Lolo Nading ay ibibigay na lamang sa kaniya para magamit niya sa kaniyang basic needs.

Nabatid na si Lolo Narding ay walang asawa at nag-iisa na lamang sa buhay.

Yari lang din sa kawayan ang bahay na tinutuluyan ni Lolo Narding. (DDC)