Mga empleyado ng gobyerno maagang pauuwiin sa Sept. 27 para sa paggunita ng Family Week

Maagang sususpendihin ang pasok sa mga tanggapan ng gobyerno sa September 27, 2021.

Sa memorandum circular na inilabas ng Palasyo ng Malakanyang, alas 3:30 ng hapon sa Sept. 27 ay pauuwiin na ang mga empleyado ng gobyerno sa ilalim ng executive branch.

Ito ay kasunod ng deklarasyon ng Family Week na ginugunita tuwing ikahuling linggo ng buwan ng Setyembre.

Ayon sa Malakanyang, pauuwiin ng maaga ang mga empleyado ng gobyerno para maipagdiwang ang “Kainang Pamilya Mahalaga Day”.

Hinihikayat ang lahat na sabay-sabay na magsalu-salo sa pagkain kasama ang pamilya.

Nilinaw naman sa circular na hindi kasama sa kautusan ang mga ahensya ng gobyerno na ang function ay nasa basic at health services, preparedness/response to disasters and calamities, at iba pang mahahalagang serbisyo.

Hinikayat naman ng Malakanyang ang iba pang branch ng pamahalaan at maging ang pribadong sektor na pauwiin din ng maaga ang kanilang mga empleyado sa nasabing petsa para maipagdiwang ang 29th National Family Week. (DDC)