Kylie Padilla nagsalita na sa hiwalayan nila ni Aljur Abrenica
Sa unang pagkakataon, nagsalita na si Kylie Padilla sa paghihiwalay nila ng kanyang mister na si Aljur Abrenica.
Sinabi ni Kylie na bukod sa kanila ni Aljur ay nahihirapan din sa sitwasyon ang kanilang mga anak na sina Alas Joaquin at Axl Romeo.
Aniya, dumaan ang kanilang pamilya sa “process of recovering, healing, and moving on” sa mga nakalipas na buwan.
Sinabi pa ng aktres na ang kailangan nila sa ngayon ay respeto – unang una sa kanilang desisyon bilang pamilya at respeto para sa bawat miyembro ng kanilang pamilya – para kay Aljur na ama ng kanyang mga anak, lalo na kina Alas at Axl, na sa ngayon ay very fragile.
Binanggit din ni Kylie ang kani-kanilang pamilya ng aktor na patuloy na gumagabay sa kanila.
Sa ngayon, aniya, ay sinisikap nila ni Aljur na magkaroon ng healthy co-parenting relationship para sa kapakanan ng kanilang mga anak.
Sampung taon naging magkasintahan sina Kylie at Aljur bago sila nagpakasal noong December 2018. (Infinite Radio Calbayog)
