Kumpanyang nagpasweldo ng barya sa kanilang empleyado inisyuhan na ng stop order
Inisyuhan ng stop order ng Valenzuela City Government ang kumpanyang Nexgreen Enterprise.
Ang nasabing kumpanya ay ang nagpasweldo ng P1,056 na halaga ng barya sa kanilang empleyado.
Sa inilabas na stop order ng Valenzuela Business Permit and Licensing Office inaatasan ang Nexgreen Enterprise na magpaliwanag sa loob ng labinglimang araw.
Ayon kay Valenzuela City Mayor Rex Gatchalian ito ay makaraang makitaan pa ng ibang paglabag ang kumpanya kabilang na ang unfair labor practices.
Batay din sa ginawang audit ng Workers’ Affairs Office ng City Hall, natuklasan na P55,614 dapat ang tinanggap na sweldo ng nagreklamong empleyado at hindi P1,056 na barya. (Dona Dominguez-Cargullo)
