Dating Pangulong Benigno Aquino III nai-cremate na; agad ding ihahatid sa huling hantungan sa Sabado
Nai-cremate na si dating Pangulong Benigno Aquino III.
Ayon sa kaniyang kapatid na si Kris Aquino, araw ng Biyernes ay magkakaroon ng misa sa Ateneo para kay PNoy at agad itong ihahatid sa huling hantungan sa Sabado.
Ililibing si PNoy sa tabi ng kaniyang magulang sa Manila Memorial Park.
Sinabi ni Kris na batid nilang marami ang nais na makiramay sa pagpanaw ni PNoy subalit hangga’t maaari ay nais nilang maiwasan na magkaroon ng “superspreader events”.
Nagpasalamat si Kris sa lahat ng nagpapaabot ng pakikiramay kasama na si Pangulong Rodrigo Duterte.
Gayundin kay Executive Secretary Salvador Medialdea na nag-alok aniya ng tulong sa kanilang pamilya.
Bilang dating kongresista, senador at dating pangulo sinabi ni Kris na karapat-dapat na magkaroon ng necrological service sa Malakanyang para kay PNoy subalit nauunawaan nila ang sirkumstansya ngayong mayroong pandemya.
