Mayor ng Baggao, Cagayan na nakipagkasiyahan at nakipagsayawan sa maraming tao, nagpositibo sa COVID-19

Positibo sa COVID-19 ang alkalde ng bayan ng Baggao sa lalawigan ng Cagayan na nakuhanan ng larawan at video kamakailan na nakikipagsayawan at nakikipagkasiyahan sa maraming tao.

Batay sa pinakahuling datos mula sa Cagayan Provincial Information Office, mayroong 212 na aktibong kaso ng COVID-19 sa bayan ng Baggao.

Ito ay matapos makapagtala ng 29 na bagong kaso sa naturang bayan.

Kabilang sa nadagdag sa mga bagong kaso ay si Baggao Mayor Joan Dunuan na nagpositibo sa RT PCR Test.

Magugunitang inatasan ni Cagayan Gov. Manuel Mamba na magpaliwanag si Dunuan kaugnay sa tahasan nitong paglabag sa omnibus guidelines on the Implementation of community quarantine matapos mag-viral ang mga larawan ng alkalde na sumasayaw sa mga social gathering na walang suot na facemask.