Isa sa mga nasa likod na pagbebenta ng COVID-19 vaccines at vaccination slots pinadalhan ng subpeona ng PNP

Pinadalhan na ng subpeona ng Philippine National Police (PNP) ang mga hinihinalang nasa likod ng pagbebenta ng COVID-19 vaccines at vaccination slots.

Sa ilalim ng Republic Act 10973, ang PNP chief at Director at Deputy Director for Administration ng Criminal Investigation and Detection Group (CIDG) ay may kapangyarihan para mag-isyu ng subpoena sa isinasagawang imbestigasyon lalo na kung high-profile crimes.

Ayon kay Police General Guillermo Lorenzo T Eleazar kailangang agad matukoy at mahuli ang mga nasa likod ng pagbebenta ng COVID-19 vaccines at vaccination slots.

“Hindi katanggap-tanggap ang ganitong uri ng gawain, totoo man o hindi, and I will do everything in my power as your Chief PNP upang mabigyan ng linaw ang isyung ito,” ani Eleazar.

Una rito ay inatasan ni Eleazar ang CIDG at ang Anti-Cybercrime Group na alamin ang mga alegasyon tungkol sa pagbebenta ng bakuna at vaccination slots matapos kumalat ang isyu sa social media.

“At least isang tao na ang kilala na ng PNP na sangkot dito kaya ang tamang gawin niya ay pumunta sa aking opisina upang magbigay linaw sa isyung ito. Huwag ka nang makipaglaro ng taguan sa ating mga kapulisan,” dagdag ni Eleazar.