Pulis mula sa Rizal pumanaw dahil sa COVID-19

Isa pang pulis ang naitala ng Philippine National Police (PNP) na pumanaw dahil sa COVID-19.

Nagpaabot ng pakikiramay si PNP chief, PGen. Guillermo Eleazar sa mga naulila ng 39 anyos na police staff sergeant.

Ang nasabing pulis na nakatalaga sa Rizal ang ika-61 nasawing pulis dahil sa COVID-19.

Nagpositibo ang pulis sa COVID-19 noong May 10 kung saan nakaranas ito ng lagnat at hirap sa paghinga.

Na-diagnose din ang pulis sa Chronic Kidney Disease at agad nadala sa ospital para sa emergency dialysis.

Noong May 15 nagsimula ang kaniyang sesyon para sa dialysis.

Subalit muli itong nakaranas ng hirap sa paghinga noong May 16 at pumanaw noong araw ding iyon.

“Nais kong ipaabot ang taos-pusong pakikiramay sa pamilya ng ating pulis na namatay dahil sa Covid-19. Handa po ang PNP sa anumang tulong na inyong kailangan”, ayon kay Eleazar.

Ang PNP ay mayroon nang 21,924 na COVID-19 cases, sa nasabing bilang 1,407 ang aktibong kaso. (Dona Dominguez-Cargullo)