Isa pang pulis pumanaw dahil sa COVID-19

Nadagdagan ng isa pa ang bilang ng mga pulis na pumanaw dahil sa COVID-19.

Nagpaabot ng pakikiramay si PNP Chief Police General Debold M. Sinas sa pagpanaw ng isang police corporal mula sa Bangsamoro Autonomous Region.

Ang nasabing pulis ay 47-anyos at nakatalaga sa Maguindanao at mayroong diabetes.

Batay sa rekord ng PNP Health Service, noong May 3 isinugod sa ospital ang pulis dahil sa lagnat at ubo.

Agad itong isinailalim sa RT-PCR test at nagpositibo ito sa COVID-19.

Noong May 5 ay pumanaw ang pulis dahil sa Acute Respiratory Failure.

Umabot na sa 58 ang bilang ng mga pulis na pumanaw sa COVID-19.

Nadagdagan din ng 87 pa ang COVID-19 cases sa PNP kaya umabot na sa 20, 936 ang kabuuang kaso ng sakit sa hanay ng pambansang pulisya.

1, 540 sa nasabing bilang ang aktibong kaso. Habang 19,365 naman ang bilang ng mga gumaling.