Barangay kagawad sa Tiaong, Quezon patay sa pamamaril

Patay ang isang barangay kagawad ng Cabay, Tiaong, Quezon matapos pagbabarilin ng tatlong hindi pa nakikilalang suspek.

Sa kuha ng CCTV footage ng pamamaril sa Barangay Kagawad ng Cabay, nangyari ang insidente bandang alas singko ng hapon ng Hunyo 28, 2023 sa Sitio Ilaya, Brgy. Cabay , Tiaong, Quezon.

Sa report ng Tiaong PNP kinilala ang biktima na si Ricky Ambita Galangga, 44 y/o Brgy. Konsehal ng nabanggit na Barangay.

Sa imbestigasyon ng pulisya, nagkaroon umano ng pagpupulong ang mga opisyal sa kanilang Brgy Hall. Nasa harap ng Brgy Hall ang biktima nang dumating ang dalawang motorsiklo at bigla nalang itong lumapit sa biktima ang isa sa mga pasahero ng nasabing motorsiklo at sa hindi malamang dahilan ay bumunot ng baril at binaril ang biktima ng ilang beses. Nagtamo ng tama ng bala sa kanang dibdib ang biktima.

Ang mga suspek, matapos ang kanilang krimen, ay sumakay sa kanilang motorsiklo at tumakas patungo sa San Juan Batangas dala ang armas na ginamit.

Narekober sa pinangyarihan ng krimen ang pitong piraso ng mga basyo ng 9mm at isang (1) piraso ng live ammo ng kalibre 9mm.

Agad namang isinugod ang biktima sa Peter Paul Medical Center ng Candelaria pero binawian na ito ng buhay.

Agad ring nagsagawa ng Checkpoint ang Tiaong PNP sa posibleng labasan ng mga suspek, malaking tulong rin umano ang CCTV footage upang magamit sa pagtugis ng mga suspek.

Patuloy ang pagsasagawa ng mga awtoridad ng hot pursuit operation sa pamamagitan ng Inteligence network para sa posibleng pag-aresto sa mga suspek. (Jay-Ar Narit)